अथ शान्तिपाठः
~~~~~~~~~~
ॐ पूर्णमदः पूर्णमिदं पूर्णात्पूर्णमुदच्यते।
पूर्णस्य पूर्णमादाय पूर्णमेवावशिष्यते।।
ॐ शान्तिः शान्तिः शान्तिः
~~~~~~~~~~~~~~~~~~~~~~~~~
मंत्र १
ईशावास्यमिद्ँसर्वं यत्किञ्च जगत्यां जगत्।
तेन त्यक्तेन भुञ्जीथा मा गृधः कस्य स्विद्धनम्।।१।।
मंत्र २
कुर्वन्नेवेह कर्माणि जिजीविषेच्छत्ँसमाः।
एवं त्वयि नान्यथेतोऽस्ति न कर्म लिप्यते नरे।।२।।
मंत्र ३
असुर्या नाम ते लोका अन्धेन तमसाऽऽवृताः।
ताँ'स्ते प्रेत्याभिगच्छन्ति ये के चात्महनो जनाः।।३।।
मंत्र ४
अनेजदेकं मनसो जवीयो नैनद्देवा आप्नुवन् पूर्मर्षत्।
तद्धावतोऽन्यानत्येति तिष्ठत्तस्मिन्नपो मातरिश्वा दधाति।।४।।
मंत्र ५
तदेजति तन्नैजति तद् दूरे तद्वन्तिके।
तदन्तरस्य सर्वस्य तदु सर्वस्यास्य बाह्यतः।।५।।
मंत्र ६
यस्तु सर्वाणि भूतानि आत्मन्येवानुपश्यति।
सर्वभूतेषु चात्मानं ततो न विजुगुप्सते।।६।।
मंत्र ७
यस्मिन् सर्वाणि भूतान्यात्मैवाभूद् विजानतः।
तत्र को मोहः कः शोक एकत्वमनुपश्यतः।।७।।
मंत्र ८
स पर्यगाच्छुक्रमकाय-
मव्रणमस्नाविर्ँ शुद्धमपापविद्धम्।
कविर्मनीषी परिभूस्वयंभूर्याथातथ्यतो-
ऽर्थान् व्यदधाच्छाश्वतीभ्यः समाभ्यः।।८।।
मंत्र ९
अन्धं तमः प्रविशन्ति येऽविद्यामुपासते।
ततो भूय इव ते तमो य उ विद्यायाँ' रताः।।९।।
मंत्र १०
अन्यदेवाहुर्विद्ययान्यदाहुरविद्यया।
इति शुश्रुम धीराणां ये नस्तद्व विचचक्षिरे।।१०।।
मंत्र ११
विद्यां चाविद्यां च यस्तद् वेदोभय्ँ सह।
अविद्यया मृत्युं तीर्त्वा विद्ययाऽमृतमश्नुते।।११।।
मंत्र १२
अन्धं तमः प्रविशन्ति येऽसम्भूतिमुपासते।
ततो भूय इव ते तमो य उ सम्भूत्याँ'रताः।।१२।।
मंत्र १३
अन्यदेवाहुः सम्भवादन्यदाहुरसम्भवात्।
इति शुश्रुम धीराणां ये नस्तद् विचचक्षिरे।।१३।।
मंत्र १४
सम्भूतिं च विनाशं च यस्तद् वेदोभय्ँ सह।
विनाशेन मृत्युं तीर्त्वा सम्भूत्यामृतमश्नुते।।१४।।
मंत्र १५
हिरण्मयेन पात्रेण सत्यस्यापिहितं मुखम्।
तत्त्वं पूषन्नपावृणु सत्यधर्माय दृष्टये।।१५।।
मंत्र १६
पूषन्नेकर्षे यम सूर्य प्राजा-पत्य व्यूह रश्मीन् समूह।
तेजो यत्ते रूपं कल्याणतमं तत्ते पश्यामि
योऽसावसौ पुरुषः सोऽहमस्मि।।१६।।
मंत्र १७
वायुरनिलममृतमथेदं भस्मान्त्ँ शरीरम्।
ॐ क्रतो स्मर कृत्ँ स्मर क्रतो स्मर कृत्ँ स्मर।।१७।।
मंत्र १८
अग्ने नय सुपथा राये अस्मान् विश्वानि देव वयुनानि विद्वान।
युयोध्यस्मज्जुहुराणमेनो भूयिष्ठां ते नम-उक्तिं विधेम।।१८।।
।। यजुर्वेदीय ईशावास्योपनिषद् समाप्त।।
~~~~~~~~~~~~~~~~~~~~~~~~~~~
शान्तिपाठः
ॐ पूर्णमदः पूर्णमिदं पूर्णात्पूर्णमुदच्यते।
पूर्णस्य पूर्णमादाय पूर्णमेवावशिष्यते।।
ॐ शान्तिः शान्तिः शान्तिः
***
